Hungaria refuzon të nënshkruajë deklaratën e BE-së në mbështetje të Ukrainës, Orban paralajmëron për konflikt me Rusinë
Hungaria është i vetmi vend anëtar i Bashkimit Evropian që nuk ka nënshkruar deklaratën e përbashkët të bllokut në mbështetje të Ukrainës, në një kohë kur Evropa po forcon solidaritetin ndaj luftës që Ukraina po bën kundër agresionit rus.
Kryeministri hungarez Viktor Orban, i njohur për marrëdhëniet e tij të tensionuara me Ukrainën dhe qëndrimet kritike ndaj politikave të BE-së, ka shprehur qartë arsyet e refuzimit të tij. Ai paralajmëroi se bashkimi i Ukrainës me BE-në mund të çojë bllokun në një konflikt të drejtpërdrejtë me Rusinë.
Orban tha se deklarata e BE-së tentonte të vendoste kushte për një takim ku udhëheqësit e Hungarisë nuk ishin të ftuar, dhe kritikoi përjashtimin e BE-së nga diskutimet e mundshme me Moskën.
“Fakti që BE-ja u la mënjanë është mjaft i trishtueshëm. E vetmja gjë që mund t’i përkeqësojë gjërat është nëse ne fillojmë të japim udhëzime nga banka”, u shpreh ai.
Kryeministri hungarez propozoi gjithashtu që zgjidhja më e arsyeshme është organizimi i një samiti midis Bashkimit Evropian dhe Rusisë, duke marrë shembullin e takimit të fundit mes Shteteve të Bashkuara dhe Rusisë.
Qëndrimi i Hungarisë përbën një sfidë të rëndësishme për unitetin e BE-së në politikën e jashtme, duke reflektuar tensionet dhe dallimet brenda vetë bllokut në lidhje me krizën në Ukrainë.
